Permen Davos

Seprane-seprene wong Jawa Tengah lan sakubenge wis ora pangling karo permen Davos. Wujude gepeng, putih rasane semriwing. Lah, angger Dawos kiye asli weton Purbalingga?. PT Slamet Langgeng depimpin daning Bapak Siem Tjong An kawit taun 1961 nganti taun 1968, lan taun 1968 jabatan pimpinan perusahaan deweken maring Bapak Toni Siswanto Hardi merga Bapak Siem Tjong An nutugna sinau maring Belanda. Bapak Toni Siswanto Hardi mimpin PT Slamet Langgeng nganti akhir wulan Juni 1983 merga dheweke tilar dunya. Kawit kuwe perusahaan depimpin Ibu Corie Sumadibrata nganti Mei 1985. Merga umur, jabatan pimpinan deweken maring Bapak Budi Handoyo Hardi kawit tanggal 1 Juni 1985 nganti siki.

Davos kuwe jeneng kutha hawane adhem sing ana neng Swiss. Kutha cilik nang pegunungan Alphen kuwe dadi insprirasine PT Slamet Langgeng njenengi permen rasa methol kiye lan sing pertama ana neng Indonesia. Merga wis dadi perusahaan sing nglegenda mestine udu prekara entheng nggo ngupakara supaya tetep eksis.

Angger ngomongna permen Davos sing wujude buder putih debungkus kertas biru tuwa. Apamaning permen Davos pancen ketelah dearani kembanggulane wong tuwa. Nggo ngrubah image kiye perusahaan nganakna pirang-pirang terobosan salah sijine diferensiasi produk. Rasa permen Davos pancen beda karo permen liyane. Seger alami tur semriwing. Pancen kiye istimewane permen Davos angger debandhingna karo permen-permen liyane. Mula ora gumun senajan merk permen wis ora etungan ning permen Davos nganti siki akeh pelanggane.

Miturut Nicodemus Hard, Managing Director PT. Slamet Langgeng, lagi jaman Jepang perusahaane nglakon bangkrut. Njuran menyat maning sawise taun 1945. Jeneng perusahaane deganti dadi PT Slamet Langgeng & Co. sing mroduksi Permen Mint Davos, Kresna, Aplina lan Davos Lux. Seliyane mroduksi kembang gula uga ana produk liya kayadene limun lan biskuit merk Slamet. Ningen kawit taun 1973 Biskuit Slamet leren produksi merga kangelen bahan baku. Jeneng Slamet Langgeng dejukut sekang aran Gunung Slamet. Langgeng kuwe supaya usahane ora mandheg. Banjur Davos inspirasine sekang jeneng kota sing hawane adem neng Swiss nggo nggambarna adem lan semriwinge kembang gula kiye.

Bahan sing nggo gawe permen Davos 98 persen gula pasir. Bahan liyane mentol lan zat pengikat. Permen Davos ora ngango zat pewarna, pengawet lan pemanis liyane. Bisa desimpen nganti 1,5 taun malah 2 taun lawase. Produk pertama Davos werna-werna rupane, ana Davos Roll sing bungkuse werna wungu. Sebungkus isi 10 blindhi regane Rp. 1000,-. Kejaba kuwe, nggo nyukupi konsumen lan ngetutna perkembangan jaman uga deproduksi Davos Lux sing bungkuse werna ijo regane Rp. 500,- nganti Rp. 1000,-. Njuran ana Davos Klasik, Rp 100,- saben blindhine. Uga ana Davos Mild lan Davos Mini.

Taun 2009 PT Slamet Langgeng gawe produk anyar, rupane Permen Koffie. Kembang gula rasa kopi kiye sebungkuse isi 50, regane Rp. 4000,-.Nicodemus Hardi ngakoni lamon konsumen sing wis klangenan karo semriwinge permen Davos utawa permen produksi PT Slamet Langgeng liyane bakal angel ucule. Senajan konsumen kuwe wis njajal permen liyane ning akhire balik maning maring permen Davos.

Kejaba kuwe Davos arep ngetokna produk inovasi liyane nggo nuruti perkembangane kebutuhan lan selera pasar. Kayadene permen nggo bocah-bocah lan nom-noman lan permen sugar free. Nggo ndhukung pemasaran Davos uga nganggo pirang-pirang konsultan pemasaran nggo ndhukung Above the Line lan uga Brand Activation. Kejaba kuwe Davos uga nganggo tagline anyar “Cara Baru Menikmati Davos”. (Joko TW)

Lewih Lengkape

Sepet Manise Gawe Kepengin Maning

Lemah Indonesia pancen subur. Tanduran apa bae bisa thukul, apa bae bisa metu wohe. Mula ora gumun angger mangsan rebah njuran regane dadi murah. Ora kejaba nang Banjarnegara sing seprana-seprene kewentar salake. Angger lagi mangsan rebah uga ora beda. Mula akeh sing ora payu njuran dadi mubah. Angger ora kebeneran malah bosok ora dadi dhuwit.

Banjarnegara duwe potensi salak lokal sing wujude gede, legi tur masir. Ning njuran nang dhaerah liya ana salak pondok, salak lumut sing rasane legi ning ukurane lewih cilik. Petani salak Banjarnegara ora njura mbabad salak lokal sing wis ana ning njuran salak lokal desilangna karo salak pondok uga salak lumut. Kasile wis genah, Banjarnegara duwe salak sing khas.

Banjarnegara ana 20 kecamatan, sing 18 kecamatan masrakate pada nandur salah. Angger gelem ngetung emperen lewih sekang 17 juta wit merga dhapurane ombyok pisan. Kasile salak nganti 282 ton unggal taune (data 2009).

Pemrentah Banjarnegara uga mbantu ngrewangi petani salak supayane teyeng ningkatna produksi, njaga mutu uga pemasaran. Mulane njuran ada kusus pasar salak sing manggone nang perek terminal supaya sing arep kulak ora kangelen goli nggawa.

Anane potensi sing pirang-pirang kiye, masrakat njuran padha kreatif. Salake ana sing degawe kripik, jenang, sirup utawane manisan lan liya-liyane. Trisila Juwantara, salah sijine masrakat sing kreatif nekuni bisnis kiye. Mau-maune mung njajal. Ning respon pasar jebule apik. Akhire dadi klangenan. Malah goli masarna produk ora mung nang Banjarnegara thok, ning kota-kota nang Jawa Tengah uga wis semebar. Malah wis gutul Jakarta, Bali , Batam, Kalimantan, DIY, Jabar uga Jatim.

Dheweke nekuni usaha kawit taun 2003. Mekar Sari Boga, manggon nang komplek Pertokoan Brayut Indah No. 4-5 Desa Gembongan, Jl Raya Sigaluh, Banjarnegara. Sekang alun-alun prenah ngetan arah Wonosobo. Aset usahane siki malah wis meh ngancik semilyar. Ana 10 karyawan tetep lan 20 karyawan borongan. Kapasitas produksine tambah dina tambah akeh. Asinan salake bisa 1000 karton/wulan @ 24 kemasan, sirupe ya 1000 botol/wulan @630 ml. Kripik Salak ya akeh, nganti 1500 bag/wulan @ 100 gram, njuran Carica in Syrup ya malah lewih akeh, bisa 2000 carton/wulan @ 24 kemasan.

Goli ngolah panganan kerajinan home industri kiye Pak Trisila nganggo teknologi sing canggih. Karyawane uga propesonal, mutu dadi jaminan, kebersihan dadi andalan. Goli nggoreng kripik salak uga dejamin ora ngrusak kadhar gizine. Sebab Pak Trisila nganggo teknologi terkini njuran panase lenga uga dejaga, kurang 100 drajat.

Merk dagange , CARIZONE, ZIGA. Malah wis hak ciptane uga wis depatenaken nang Kementrian Hukum lan HAM. Urusan ijin sekang para pihak sing kawogan uga pepek. Pengawasan produk uga wis olih ijin sekang BPOM malah olih predikat Bintang 1. Mula ora usah kwatir olahan produk Boga Sari Boga aman dekonsumsi. Pancen siki lagi ngupaya bisa nembus jaringan pemasaran supermarket Matahari grup, ramayana grup, alfamidi lan liya-liyane sing pancen ana nang kabeh wilayah Indonesia. Priwe, padha penasaran karo olahan salak Banjarnegara? Maran padha decicipi. (03)

Lewih Lengkape

Peyek Yutuk

Mumete Ora Ngapoki

Yutuk utawa sering uga diarani undur-undur segara. Kewan kiye angger sing lembut cokan nggo umpan mancing. Ning angger sing wis sejempol-jempol cokan deolah nggo sing mancing, contone nggo gawe peyek yutuk. Peyek yutuk gampang pisan degolet nang sedawane pantai mbang wetan Cilacap. Nang Pante Widarapayung ya akeh pisan. Saben warung mesthi nyandhing. Peyek yutuk enake depangan bareng pecel utawa lotek nyambi nyawang banyu segara. Angger arep karo kupat ya enak.

Bumbu lan bahan sing nggo gawe peyek yutuk ya padha bae karo gawe peyek liyane. Bawang, ketumbar, uyah karo kencur. “Aku jan-jane angger bar mangan peyek yutuk madan mumet, tapi wong enak ya tek pangan bae. Sing penting aja kakehen,” Ujare Nanung, wong Purakerta sing lagi plesir nang Widarapayung.

Bakul-bakul bisa nggolet yutuk dhewek nang pinggiran segara. Ning sing akeh ya padha tuku yutuk njuran degawe peyek. Rega yutuk urip sekilone Rp. 15 ewu. Rata-rata peyek siji ana yutuke lima. Ning ana uga sing degawe kerep, nganti 8 utawa 10 blindhi.
Carane gawe peyek, yutuk degodhog dhisit njuran dekisatna. Angger wis adhem nembe degoreng karo jer-jeran glepung sing wis debumboni. “Pokoke padha karo gawe peyek lah,” critane Mbok Slamet sing dodolan peyek yutuk, pecel, tahu, mendhowan, kupat lan panganan liyane.

Rega peyek yutuk mung sewu lima ngatus. Angger tukune madan akeh ya malah cokan deimbuhi, jere nggo seduluran karo sing tuku. Angger sing yutuke madan kerep ya rong ewu. “Ya, alhamdulillah. Wingi bar bada akeh pisan sing padha plesir. Dadi peyek yutuke payu akeh,” Mbok Slamet crita karo mesam-mesem.

Jere kabar nang internet, yutuk utawa undur-undur segara kiye uga duwe kasiat. Ana penelitian sing nidhoki lamon yutuk kuwe ngandhung lemak total sing cukup dhuwur antara 17,22 nganti 22,56 presen. Kandhungan asam emak omega3 total (EPA lan DHA) uga dhuwur, anara 7,75 nganti 14,48 presen debandhing karo kewan sing cangkange atos kaya yuyu utawane urang.

Nah, angger kandhungan EPAne kuwe 6,41 nganti 8,41 presen lewih dhuwur teninmbang DHAne sing mung 1,34 nganti 6,57 presen. Anane kandhungan asam emak omega3, yutuk jere monge bisa ngunggahna kadhar insulin sing fungsine bisa ngedhunaken kadhar gula kanggone penderita diabetes. Senajan yutuk ngandhung zat sing apik nggo kesehatan, ning gutul siki ahli gizi urung kompak nemtokna fungsine yutuk nggo kewarasan utawa obat.

Ucul sekang bab kesehatan, peyek yutuk pancen kena dearani panganan khas nang pesiri kidul, Cilacap mbang wetan. Dadi angger padha plesir maring Widarapayung utawa pantai seatan liyane, maran padha decicipi peyek yutuke sing gurih.(03)

Lewih Lengkape

Soto Jatisaba

RASANE NYAMLENG PISAN

Jan-jane sing dadi bakul soto jenenge Pak Khariri. Merga panggonane adoh sekang kota, genahe neng desa Jatisaba, Kecamatan Purbalingga, mulane sing padha tuku padha ngarani Soto Jatisaba. Sekang kota prenahe ngetan antarane 2 km.

Pak Khariri wis ngawiti dodolan soto taun 1960. Mau-maune goli dodolan ngider, kiter turut umah. Ning kawit taun 1970 Pak Khariri goli dodolan netep neng umahe dhewek. Aja kewatir ora gutul panggonane Pak Khariri, pokoke angger wis neng Jatisaba, takon wong neng pinggir dalan mesthi nidhokna; ‘nika teng mrika’.

Sing dadi pelanggan Soto Jatisaba awit wong biasa nganti para pejabat. Mulane kena dearani meh saben ana acara gedhean neng kabupaten, kaya silaturahmi utawa perpisahan pejabat, ora keri nyedhiani Soto Jatisaba kiye.

Racikane soto werna-werna. Kupat, mi soun, kecambah ijo uga daging sapi. Krupuke nganggo canthir utawa karag. Njuran deuwuri kacang goreng, muncang-sledri ora keri brambang goreng. Sambele nganggo sambel kacang.

Banyu sotone banget segere. Temenan. Ana maning sing ora kalah pentinge, kecape gaweyane dhewek. Mulane beda karo liyane, nglangeni pisan.

“Lah, enggane patuta inyong arep nambah maning,” ujare Pak Winarso sing nembe rampung mangan soto karo ngelapi kringet sing gemrobyos.

“Temenan, Mas. Marem pisan mangan sotone Pak Khariri. Daginge akeh, empuk, banyune seger, sambele ya buket. Dhuwit 20 ewu kena nggo wong telu.” Bocah lanang neng jejere Pak Winarso ngimbuhi omong karo ngenyot es teh nganggo sedotan.

Kanggone wong Purbalingga, khususe sing neng kota, Soto Jatisaba wis dadi klangenan. Mulane senajan uripe wis padha manggon adoh neng paran, angger pas maring Purbalingga padha nyelakna mampir nyoto maring Jatisaba. Maran padha dejajal. (03)

Lewih Lengkape

Sambel Bakar " Siwarak "

Neng tlatah Purbalingga, akeh banget panganan sing dadi ciri khase. Ana Godhogan tales, kimpul, suweg, kripik munthul, strawberry, es duren, sroto so lan liya-liyane. Kiye ana siji maning sing khas banget neng dhaerah Gowa Lawa, persise neng desa Siwarak kecamatan Karangreja, Purbalingga. Arane Sambel Bakar Cengis Ijo.
Pala bukane kaya kiye. Desa Siwarak kuwe panggonane neng erengan gunung Slamet iring wetan. Dadi pancen hawane adhem. Lah angger hawa adhem mangane ora pedhes jere ora marem. Mulane warga neng desa kiye padha ngada-ada kepriwe carane angger mangane kemaruk ning ora kakehen wragad.

Jere, ganu-ganune ana wong arane Kaki Merta. Pedinane lunga meng alas. Angger bali ngumah neng ngisor ram kudu ana sambel nggo lawuh madhang. Pancen, madhange dadi olih akeh merga ana sambele. Ning pog-pogane wetenge Kaki Merta dadi mules akhire dadi bolan-balen maring mburi.
Kaki Merta pancen ora kapok mangan sambel senajan wetenge dadi mulus. Ning Nini Merta sing nyawang malah dadi melas. Mulane dheweke ngada-ada gawe sambel sing ora ndadekna mules. Nini Merta nggerus Lombok cengis ijo, brambang karo uyah. gawe sambel. Njur cirine debakar neng ndhuwur pawon. Kukuse sambel mlekiki pisan, ngrebesna mata. Malah uga gawe gebras-gebres, wain ora leren-leren. Angger sambel bakar jaman siki wis ana inovasine. Padha deimbuhi tempe semangit, jlantah karo micin semendhing.
Kaya biasane, bali sekang alas Kaki Merta langsung bae mbukak ram neng meja pedangan. Dheweke weruh ana ciri klewus pisan merga kenang awu, ning isine sambel. Ngkana-kanane Kaki Merta arep ngomehi sing wadhon. Ning ndilalah Nini Merta lagi neng peturasan mburi umah.
Merga wetenge wis kemruyuk awit esuk urung kisenan sega, Kaki Merta langsung bae nyidhuk sega sing pancen wis cemawis. Manggang-manggong arep ngerod sambel. Ning akhire njajal sekerodan. Kecap-kecap, demat-matna. Kayong beda karo biasane, lewih marem tur lewih nunjek pedhese. Tela, goli madhang malah tanduk, nyiduk sega maning nganti balen pindho. Kringete gemrobyos ngungkuli angger lagi macul neng alas. Nini Merta sing nembe rampung adus metu sekang peturasan niyate arep mbatiri Kaki Merta madhang. Ning basa nyekel ajang, dheweke ndomblong weruh ciri sambele bresih. Ora uman sambel.

Nganti sore Kaki merta sing kewaregen sambel ora sambat wetenge mules, wengi, njur esuk. Ora sambat bae. Mulane agi arep mangkat maring alas dheweke njaluk degawekna maning sambel sing kaya wingi maring Nini Merta.
Critane Kaki Merta sing ora mules merga mangan sambel bakar suwe-suwe semebar maring tangga teparo neng desa Siwarak. Nganti siki esih dadi klangenane wong Siwarak. Hawa adhem madhange lawuh sambel sing ora gawe mules. Lewih nylekamin maning angger sambel bakar kuwe debatiri karo gorengan tahu utawa tempe, gesek lan lodheh terong. Temenan, mertuwane liwat kelalen ora tawa mangan. Kringete gemrobyos pating prentul kaya brondong jagung. Tela koh… (Suratman, Warga Siwarak, Karangreja, Purbalingga-03)

Lewih Lengkape