Wahana Petualangan Lan Rekreasi

Sapa bae mesthine kepengin marem angger agi plesir. Mulane jaman siki akeh banget panggonan plesiran sing ngupaya gawe fasilitas lengkap supayane sing teka marem. Angger marem njuran kepengin mbaleni maning. Apamaning angger panggonane nyediakna panggonan nginep, mesthine dadi goletan merga wong sing plesir ora kebingungen nggolet penginepan angger nyatane esih betah.

Angger kepengin plesiran sing gawe  seneng, seru, uga nantang adrenalin teka bae maring Surya Yudha Park neng Jl. Raya Rejasa, Banjarnegara. Surya Yudha Park ngumpulna nyawisna kebutuhane wong plesiran dadi sepanggonan. Anane kebutuhan rekreasi sing bener-bener bisa nggo ngademna pikiran dadi konsep utamane Surya Yudha Park. Dhasare goli debangun ancase pancen ora mung mligi gawe panggonan plesiran sing nyenengna pendelengan. Ning uga ana tantange.

Neng babagan penginepan, Bambang Suryadi, Senior Manager Surya Yudha Park, ngomongna lamona siki Surya Yudha Hotel duwe 101 kamar. Kamar hotele sekang Standar Room, Superior Rooms, Deluxe Room, Executive Room, Family Room, Royal Suite Room uga ana President Suite Room. Neng Surya Yudha Hotel uga delengkapi 7 ruang pertemuan sing kapasitase nggo 25 nganti 1000 wong. Mula kuwe bisa nggo pirang-pirang kegiyatane corporate, akademik utawane sosial. Neng kene uga ana fasilitas resto, kafe lan akses wifi. Rencanane Surya Yudha Hotel arep deresmekna tanggal 6 Oktober 2012.

Nyewijine hotel lan water park miturut para tamu kesane unik. Beda karo panggonan plesiran liya. Surya Yudha Park sing panggonane ora adoh sekang kali Serayu pancen  manpangatna potensi alam nggo plesiran lan bertualang.

Konsep Destinasi Wisata Terpadu

Surya Yudha Park klebu panggonan plesir anyaran neng Banjarnegara. Surya Yudha Park debangun kanti cara terpadu antarane fungsi penerangan, pendidikan lan hiburan. Delengkapi karo pirang-pirang sarana wisata rekreasi lan hiburan sing paling lengkap neng Jawa Tengah. Wahana sing detawakna Surya Yudha Park yakuwe:

1.      Fun Rafting (Arung Jeram)

Nyawang asrine alam desa kambi ngetutna ilene kali serayu sedawane 10 KM. Mlakune antara 2-3 jam suwene. Rutene demolahi sekang Singomerto utawa Bojanegara. Saben prau ana pemandu sing wis pengalaman, dekawal neng prau rescue. Basa finish njuran ana suguhan dawegan karo mendhowan, mandhang awan, sertifikat lan asuransi. Bab keslametan lan kenyamanan wisatawan dadi prioritas. Mulane ora usah kewatir kenang apa-apa sebab wis deupayakna maksimal.

2.      Surya Yudha Water Park

Ana 7 kolam, 7 variasi jerone. Ada kolam prestasi, kolam renang arus, kolam renang ombak tsunami, kolam lesehan, kolam anak, 10 cm, 20 cm, 40 cm, ngati 150 cm. Seliyane kuwe uga delengkapi pirang-pirang wahana dolanan sing mesthi seru lan nantang.

Kolam arus Surya Yudha Park banyune mili deres. Neng nduwur kolam arus pengunjung bisa ngelikna awake. Kolam arus Surya Yudha Park deoperasikna nganggo teknologi khusus mulane bisa mili 24 jam. Banjur Water Boom-e duwe seluncuran sedawane 30 meter muter terjal. Ngeli bareng banyu klebu sensasi sing detawakna water Boom Surya Yudha Park. Angger kolam Tsunami, ombake duwure nganti 1,5 meter nganti butul neng nduwur kolam. Banyune mili banter lan bisa mbalang awak. Neng kene pengunjung dewei sensasi deburu ombak sing dhuwur.

3.      Pijat Ikan

Ora mung ngilangna stres thok, pijat ikan uga depercaya bisa nurunaken tekanan darah tinggi. Pengunjung mung gari njagong njuran ngejorna iwak garafura padha nggrumuti sikil. Cokotane iwak bisa ngrangsang kebukake simpul syaraf lan peredaran darah. Awake dadi krasa rileks lan seger.

4.      Surya Yudha Sport Center

Pirang-pirang fasilitas olahraga cemawis nang kene. Ana lapangan badminton, voli, tenis meja, futsal. Lapangan futsale sekang suket sintesis uga lapangan kayu. Njuran ana lapangan tenis lapangan uga billiard. Kabeh neng indoor. Sing outdoor uga ana; lapangan voli lan lapangan golf 9 hole. Agger wisatawan kepengin olahraga ringan, neng kene uga ana fasilitas bilyard. 3 meja bilyard bisa denggo njajal drawshot lan followshot.

5.      Out Bond

Desediakna sarana Outbond neng darat lan banyu. Fasilitaase lengkap-lengkip. Uga debimbing neng instruktur sing profesional. Uga ana Flying Fox paling dawa neng Jawa Tengah, 200 meter, sing bisa nguji andrenalin.

Amazing Land

Anane fasilitas sing pepek ora ndadekna manajemen Surya Yudha Park rumangsa marem. Tetep ngrekadaya kepriwe carane apa sing wis ana delengkapi maning. Surya Yudha Park sing ambane 3 hektar ewih siki lagi ngrancang anane Amazing Land.

Wahana tambahan kiye delengkapi sarana dolanan lan hiburan kayadene kuda putar, kereta mini, bianglala, kora-kora, bola air, sepeda air, sepeda udara, pemancingan, drum molen, taman mini uga panggung hiburan.

Priwe, padha kepengin plesir mbokan? Maran nggolet wektu sing pas padha plesir mari Surya Yudha Park dejamin betah tur kepengin balik maning. Sing arep nginep ya hotele bersih, nyaman tur murah. (SR-RP)

Lewih Lengkape

Wisata Husada Kalibacin

ADUS WELIRANG KON TAMBAH AYU

Obyek plesiran sing siji kiye pancen beda karo liya-liyane. Ya beda panggonane, beda kahanane, beda rasane, beda ambune. Wisata Husada Kalibacin. Deneng Kalibacin? Iya. Pancen banyune mambu mergane ana kandhungan welirang lan zat mineral liyane.

Panggonane neng Desa Tambaknegara, Rawalo, Banyumas. Antarane 17 km sekang Purwokerto, tepate neng lor Bendung Gerak Serayu. Gampang goletane merga neng pinggir gili gedhe Purwokerto-Bandung.

Obyek wisata Kalibacin jane wis lawas madege. Ning nembe taun 1985 depugar lan debukak maning. Miturut dongeng, taun 1503 Kadipaten Bonjok nguwasani tuk banyu neng ngisor gunung nggo ngileni sawah. Taun 1800an Kadipaten Bonjok dekuwasani neng Landa, Kalibacin ora kejaba. Merga tuk banyu kuwe miline gedhe tur ora nglakon sat, taun 1892 njuran degawe padusan. Sangking kewentare tuk banyu kiye akhire taun 1909 Pakubuwono X teka maring Kalibacin saprelu tetirah, nginep nganti 3 dina. Petilasan kuwe nganti siki esih derumat lan depundhi daning warga sekitar Kalibacin. Mulane angger sasi Sura, masrakat nganakna upacara, malah sing teka ora mung warga Kalibacin thok. Sing sekang paran uga akeh.

Taun 1942 gentenan Jepang sing nguwasani Kalibacin. Dedadekna markas, malah nganti gawe benteng sing aran ‘gua kodo’. Taun 1945-1948 derebut maning neng Landa. Ning ora kerumat, akhire tambah rusak. Sewise ana proklamasi, para pejuang lokal sing depandhegani neng Pudjadi Djaring Bandajoeda ngrebut Kalibacin sekang Landa.

Lawas ora kerumat, lawas ora derumat. Taun 1985 Pemrentah Propinsi Jawa Tengah liwat APBD mugar komplek tuk banyu neng Kalibacin, njuran dedadekna obyek plesiran. Mipil semendhing deapiki, mipil semendhing decukupi. Njuran lagi jaman Kepala Dinas Pariwisatane pak HM. Santoso, SH, (taun 2002) Kalibacin detambahi langenan supayane sing plesir ngrasakna betah kecehan banyu welirang.

“Alhamdulillah, anane kolam renang ningkatna jumlah wong sing kepengin adus neng Kalibacin,” Ujare sing ngreksa Wisata Husada Kalibacin, Dewi Kamawati. “Sing maune setaun mung 3 ewu, siki bisa nganti 7 ewu lewih.” Dewi ngimbuhi.

“Ora suwe maning malah arep ana tambahan wahana air rupane ‘mangkok wutah.” Omonge Dewi nyritakna konsep taun 2011 kiye.

Masrakat saubenge Kalibacin uga ngrumangsani obyek Wisata Husada Kalibacin akeh manpangat lan mberkahi. Mulane dadi akeh restoran utawa hotel, malah ana Kelompok Sadar Wisata utawa Pokdarwis. Winginane menang neng tingkat propinsi, dadi Juwara I. Siki masrakat Pokdarwis lagi siap-siap makili Jawa Tengah neng tingkat Nasional ngenani lomba Pokdarwis. Program unggulane kuwe ganyongisasi. Rupane manpangatna pekarangan sekitar umah nggo nandur ganyong sing mengkone arep deolah dadi werna-werna panganan.

Kandhungan Banyu Kalibacin

Banyu Kalibacin pancen beda karo bayu liyane. Sebab ana kandhungan zat mineral sing debutuhna awak. Ana kandungan welirang nganti 13,50 mg. Florida HCL 21,30 mg, Kalsium 58,11 mg, Zat Organic 5,37 mg, uga ana kandhungan Nitrit lan Zink.

Banyu tuk Kalibacin bisa ganti-ganti wernane. Kadhang keton bening nganti dhasar kolame keton, kadhang ijo kaya banyu segara, kadhang biru enom utawa uga keton buthek. Sing kaya kiye gemantung cuaca lan sorote srengenge.

Kandhungan mineral utamane welirang cocog pisan kanggone kulit sing kenang prenyakit. Uga pas pisan nggo nyegerna awak. “Wah, banyune bisa nggo terapi kecantikan lan kebugaran,” ujare Pak Budi Soma Putra sing mbahureksa situs Kalibacin nirokna omongane Kepala Dinas Pemuda Olahraga kebudayaan dan Pariwisata (Dinporabudpar), Dwi Pindarto, SH, M.Hum.

Karcis mlebune murah, mung Rp. 3.500 wis klebu tiket lokasi kolam renang, pancuran lan asuransi.

Wisata Husada Kalibacin pancen potensial dekembangna. Seliayane nggo plesiran uga bisa nggo sinau sejarah, sinau situs peninggalane leluhur. Ning angger dematna, kayong urung ana nggon parkir.

“Ganu wis nglakon ana MoU antarane pihak Desa Tambaknegara karo Dinas Pariwisata ngenani lahan parkir, ning seprene urung klakon. Malah ganu yo wis derencanakna arep degaweknapanggok sajen lan peturasan neng komplek Kalibacin.” Pengarepe Pak Budi Soma sing nganti siki pancen urung kelaksanan. (03)

Lewih Lengkape

Plesir Maring Serulingmas

"BISA POTO KARO DEGUBED ULA"

Kolam nggon ciblonan karo plorodan.

Arep numpak gajah ya bisa

Obyek Wisata Seruling Mas Banjarnegara kejaba duwe koleksi sawernane kewan, uga wis duwe pasilitas kolam renang, water boom, dolanan bocah: sepur mini, undar, ombak banyu, jaran puter lan liya-liyane. Kejaba kuwe sing plesir bisa nunggang gajah, onta utawa jaran cilik. Ora mung kuwe, sing ora kalah nyenengna kuwe para pengunjung bisa poto karo kewan. Nyenengi pisan mbokan?

Kewane akeh lan kumplit. Kawit sekang sing sikile loro, sikile papat tekan kewan sing ora ana sikili ya ana. Kewan sing sikile loro ya manuk, kuntul, blekok, ayam alas, dara. Ana maning sing aran kethek, munyuk, lutung, orang utan, beruang lan liya-liyane.

Kewan sing sikile papat yakuwe macan, singa, gajah, jaran, menyawak, baya, onta, jaran kidang lan sapanunggalane. Kewan sing ora nduwe sikil ya ula.

Kewan-kewan sing nang Serulingmas klebu kewan “langka” sing meh punah. Ora kabeh wong bisa ngingu kewan sing kaya nang kana sebab kewane anane nang alas thunthang, gung liwang liwung, ora tau deambah wong, jis kepati pati, jin, setan, dhemit padha gentayangan. Mulane angger plesir maring Serulingmas bisa nggo nambah pengalaman lan ngelmu. Bisa weruh pirang-pirang kewan alasan sing deingu nang kana.

Ora kabeh kewan neng Serulingmas galak. Akeh uga sing wis cumbu utawa lulut. Contone orang utan, ula Sanca, jaran utawa gajah. Angger arep padha poto bareng kewan Serulingmas ya bisa, ningen aja kasi poto rangkulan karo kewan sing dekrangkeng kaya singa, mbilung utawa orang utan, kuwe bahaya.

Angger arep poto karo gajah, ula, onta utawa karo jaran bae. Kuwe klebu kewan sing lulut tur manutan. Arep foto jejeran utawa rangkulan ya ora apa apa, malah sing maen foto karo nunggang gajah, onta utawa jaran. Angger arep kepengin poto digubed ula ya bisa, dejamin aman sebab ana pawange. Sing penting ngati-ati lan manut karo pawange. Mangga sedulur, tindak bae plesir nang Serulingmas. Pokoke marem. (Giri P).

Lewih Lengkape