Kepengin Dadi Dokter Sing Ramah

“Sing jenenge murid nang endi baen mesti ngadhepi masalah pirang-pirang. Kadhangan masalah sekang umah urung rampung, ketemu maning masalah nang sekolah, nang pergaulan. Malah ketambahan kudu ngadhepi ulangan sing pirag-pirang. Pokoke sing aran masalah ora ana rampunge. Ning anane masalah kuwe ora njuran dejorna, tapi derampungi. Supaya ora mumet ya karo mesem goli ngadhepi,”

Kaya kuwe tinemune Anisa Faedatul Warohmah utawa sing sering deundang Nisa. Siswa kelas VIII SMP Negeri 3 Bukateja kiye dadi ranking 1, rata-rata bijine 89. Kawit nang SD bijine uga apik.

“Angger kabeh masalah deadhepi karo mesem, ora grusa-grusu, ora kesusu, ora kemrungsung emperen masalah kuwe bisa rampung,”

Nisa pancen bisa dearani bocah ndesa sebab pancen asline bocah desa. Nisa lair nang Desa Kebutuh, Bukateja. Sugito Ali Miftahudin lan Rahmawati sing dadi rama biyunge mung buruh tani. Senajan wong tuwane mung buruh tani, Nisa ora mungkret goli duwe cita-cita. Dokter. Ya, Nisa kepengin dadi dokter sing bisa tulung sepadha-padha, maring wong ora mampu, lewih-lewih maring wong desa sing pancen esih kurang wigaten maring babagan kesehatan.

Bijine apik bocahe aktip. Nisa pancen sregep nang organisasi sekolahan, ana OSIS, PMR, Pramuka uga KKR. Sebab pancen dheweke ketua PMR nang sekolahan, mulane angger ana lomba PMR ya Nisa kon makili. Maju lomba PMR Teladan Tingkat Kabupaten kasil Juara I, Tingkat Propinsi dadi Juara Harapan I. Lomba Pramuka Perwira Adventure Tingkat Kabupaten olin Nomor I, Lomba BFAI Tingkat Kabupaten ya Juara I lan esih akeh prestasi liyane maning.

Nalikane Nisa dejaluki penemu ngenani akehe tawuran sing detayangna TV dheweke semaure entheng. “Alhamdulillah nang SMP 3 Bukateja Kepala Sekolah wis gawe tim khusus. Tugase ana sing ngemutna murid saben arep mlebu sekolahan, ana sing tugase ngecek tas ngantisipasi murid ana sing nggawa macem-macem. Seliyane kuwe, murid lan wong tuwane uga dekumpulna bareng nang sekolahan saprelu njelasna platuran lan tata tertib sekolah. Sing lewih tegas kuwe; murid SMP 3 mbuh sapa bae angger terlibat gelut utawa tawuran mesthi bakal langsung detokna.” Semaure Nisa ndrubul mungkasi dopokan. (Kang Narso)

Lewih Lengkape

Kepengin Mabur Ora Nganggo Wulu

Wis dadi lumrahe bocah wadon mesthi lulut maring biyunge. Apamaning anger bocah ragil. Semana uga Kreatifanti Nadia Aprilia sing biasa deceluk Nadia. Prawan manis sing duwe pawakan cilik dhuwur kiye ragilane Ibu Puji Kristyaningtyas lan Pak Edy Putra. Angger wis ketemu karo biyunge mesthi karepe ngglibed bae. Biyunge lunga maring endi Nadia mesthi nginthil mburine. Pokoke kaya es teh karo mie ongklok, hehehe.

Nadia asli weton Banjarnegara, 25 April 1996. Siki sekolah nang SMA 1 Banjarnegara Kelas XI IPA. Neng sekolahan lan pergaualan pedinane Nadia melu pirang-pirang kegiyatan. Melu paduan suara, teater, tari uga modelling. Bakat seni pancen mudhun sekang biyunge. Angger hoby olahraga ketularan ramane sing pancen dadi guru olah raga. Ning siki Nadia lewih fokus maring modelling. Mulane kegiyatan kaya Pemilihan Duta Wisata, Putri Batik lan sejenise wis bola-bali depeloni. "Melu kegiyatan kiye akeh manpangate," ujare Nadia, "kena nggo nglatih rasa precaya diri angger ngadhepi wong akeh."

Pancen ora luput, malah gathuk pisan karo cita-citane sing kepengin dadi pramugari. Dadi pramugari? "Ya, kon teyeng mabur senajana ora duwe wulu", ujare dheweke karo ngguyu. "Dadi pramugari teyeng lunga-lunga kesampak maring nusantara malah tekan manca. Gratis, malah olih gajih", kaya kuwe pinemune Nadia. Ning sing baku dudu kuwe thok alesane. Jerene, dadi pramugari uga propesi sing mulia merga nglayani wong akeh sing arep lelungan.

Nadia uga seneng pelajaran basa asing, utamane Basa Inggris lan Jepang sing deampu daning Bu Rani, guru Basa Jepang SMA 1 Banjarnegara. Kejaba kuwe, Nadia ora njur nyepelekna Basa Jawa utawane Basa Banyumasan. "Kuwe toli bahasa Ibu, kudu deregani lan kudu tetep lestari merga kuwe basa pedinane wong Banyumas Raya klebu wong Banjarnegara," ujare Nadia mantep.

Neng jagad bebrayan Nadia uga ora pilih-pilih batir, sapa bae dadi bala. Ning kuwe mau, dhasar bocah bontot sipat kabongane ora ilang. Ya maring kakang mbarepe, Kreatifandi Pramana Putra sing siki dadi pegawe BRI Ajibarang lan mbekayune Kreatifani Ayu Wardani sing lagi kuliah nang Jogja. Lan mesthi bae, karo biyunge, Bu Ningtyas sing seneng nggawekna sega goreng spesial karemane Nadia.

Bocah siji kiye kawit cilik pancen dewulang disiplin neng Rama Biyunge. Ujare ramane Nadia "Disiplin kuwe kunci keberhasilan". Ya disiplin neng babagan apa bae; wektu, anggon-anggon, administrasi uga sinau. Mulane senajan kegiyatane akeh Nadia tetep teyeng mbagi wektu. Kejaba kuwe, biyunge terus ngasah Nadia kon dadi bocah sing kreatip. Ya kreatip nang bab apa bae sing apik-apik lan kudu akeh keprigelane. Pancen wong tuwa aweh paring jeneng maring putrnane, kuwe donga. Supayane bisa kesembadan sing dadi gegayuhan mau: teyeng mabur senajan ora duwe wulu. (Mujipras).

Lewih Lengkape

Kepengin Dadi Pramugari

Hawa sore sing adhem krasa anget bareng nyawang eseme Laras. Arane Amanda Laras Sakanthi ning biasa deceluk Laras, lair 3 Oktober 1996. Bocah wadon sing duwe kesenengan njoged karo acting kiye anak nomer telu sekang bapak Sujoko lan Ibu Ismiyati. Umahe neng desa Pandansari RT 01 RW IV kecamatan Ajibarang, Kabupaten Banyumas. Pancen bocah bontot, solah bawane ya sarwa aleman. Maring ngendi bae mesti njaluk detutna neng bapane utawa neng biyunge. Ningen Laras klebu bocah sing manut karo wong tuwa lan ora kakehen polah.

Prestasine Laras pirang-pirang. Contone, neng sekolahan tau dari juara 1 Tari Jawa tingkat kecamatan taun 2006, juara 1 lomba Senam Sehat Indonesia taun 2007, juara 1 tari tingkat kecamatan taun 2007, juara dongeng kecamatan taun 2007, juara II dongeng Jawa tingkat Kabupaten, lan juara 1 pidato tingkat kecamatan. Laras uga tau dadi juara III lomba musikalisasi puisi antar SLTP taun 2008, juara I lomba musikalisasi puisi antar-SMP taun 2009, juara III Kompetensi tari Banyumas antar SMP se-eks Karesidenan Banyumas lan juara III lomba tari (tari Srikandi Mustokoweni) antar SLTP se eks Karesidenan Banyumas.

Prestasine neng njaba sekolah uga ora semendhing, kayadene ; juara 1 foto model Java ent. Taun 2005 neng Jakarta, juara 1 anak berbakat BMC taun 2006 neng Jakarta, juara harapan 1 pesona busana Pesta taun 2007 neng kabupaten, juara harapan 1 model cilik piala Bupati taun 2007, lan juara I busana muslim tingkat remaja taun 2008.

Laras sing siki kelas XI IPA 1 neng SMAN 1 Rawalo, prestasine pirang-pirang ning ora mung mentingna prestasine neng bidang nonakademik. Dheweke uga mentingnya masalah sekolah, mulane neng kelase ya esih klebu sepuluh besar. Dheweke peringkat 5 neng kelase. Ujare bapak Wahyu Wibowo guru olahraga sing dadi wali kelase neng SMA, pelajaran basa Inggrise Laras bijine 9. Pak Wahyu nambahna, kejaba pinter Laras uga bocah sing energik, supel, ceria lan dheweke uga dadi motivator kanca-kanca liyane.

Sing pungkasan Laras detakoni babagan cita-cita. Laras mangsuli karo mesem jere dheweke kepengin dadi pramugari. Mulane arep sregep sinau ben cita-citane kesembadan. “Dongakna ya...,” ujare Laras karo mungkasi tembung.[SR]

Lewih Lengkape

“Ora Kepengin Mung Dadi Dokter”

“Deneng ngrayu bocah cilik kon manut depriksa angel temen ya?” omongan kuwe metu sekang lambene Tiara wektu pemotretan.

Tiara Gian Puspi. Undangane Tiara, lair 15 Juli 1992 neng Cilacap. Ngrampungna sekolah dasar neng SD Al Irsyad 01 Cilacap, nerusna maring SMP Negeri 1 Cilacap. Sewise kuwe njuran mlebu SMA Negeri 1 Cilacap. Siki dadi Mahasiswa Semester 2 neng Fakultas Kedokteran Universitas Jenderal Soedirman Purwokerto.

Seliyane sibuk kuliah Tiara uga aktif neng organisasi Pecinta Alam Fakultas Kedokteran Unsoed, OSIPITAL. Njuran aktif uga neng HSC (Health Study Club), kumpulane mahasiswa kedokteran sing padha seneng jagad tulis.

Pancen, Tiara ora kepengin mung dadi dokter thok. Tegese dheweke kepengin dadi dokter sing ngreti kahanan lingkungan. Ora mung lagi neng ruang praktek, ngadhepi pasien utawane ngracik obat, ning nggatekna kewarasane masrakat. Contone, aweh pengerten maring masrakat bab pentinge njaga kesehatan awak lan lingkungan.

Putri mbarepe pak Yoni Sugianto sing dadi PNS neng RSUD Cilacap lan Ibu Endah Puspitowati sing uga PNS neng Dinas Kesehatan Kabupaten Cilacap duwe pengangen-angen dadi dokter neng desa. Tujuan seliyane bias tulung ngobati masrakat sing mriyang uga bisa melu ningkatna kesejahteraan masrakat. “Angger masrakate sejahtera, tolih pada ora gampang lara,” semaure Tiara detakoni kenangapa masrakat kudu urip sejahtera.

Senajan mbekayune Sekarini Gian Puspi lagi dhong pemotretan krasa kangelan nglumuhi bocah cilik depriksa dheweke malah tambah mantep goli kepengin dadi dokter. “Apamaning mbesuk angger wis mriksa sing temenanan ya. Wah tambah menarik,” Tiara ngomong karo mesem.

Manggu-manggua saben desa ana dokter, anak polindese uga ambulane sisan. Dadi masrakat sing mriyang gageyan bisa detulungi. “Insya Allah mbesuk tek usahakna bisa kaleksanan.” Pengarepe Tiara. Amin. (03)

Lewih Lengkape

“Kepengin Praktek Neng Desa”

Prawan ayu sing siji kiye jenenge Nurina Habsah, ningen biasa deceluk Risa. “Celukan Risa kiye penjalukan sekang ninine merga Risa putu sing pertama,” ujare biyunge Risa. Anak mbarepe Pak Chairuddin lan Bu Siti Maemunah kiye duwe adhi kembar loro lanang, Fachmi Muzaqii lan Fachri Muzaqii.

Adi kembare Risa Fachmi Muzaqii siki semester II jurusan Kedokteran Gigi neng Universitas Jendral Soedirman lan Fachri Muzaqii jurusan Arsitek semester II neng Universitas Islam Indonesia, Yogyakarta.

Risa lair neng Jakarta tanggal 8 Juli 1991. Kawit cilik Risa urip neng Jakarta merga ramane Risa asli sekang Jakarta lan wektu semana nyambut gawe neng Jakarta. Biyunge asli Jatilawang, Jatilawang pensiuanan BNI Jakarta.

Wektu SD Risa sekolah neng SD Swasta Nasional Bekasi, Jawa Barat. Njuran lulus SMP Risa nerusna sekolah neng SMP Negri 2 Purwakerta. Lulus SMP Risa nerusna maring SMAN 1 Purwakerta, Banyumas.

Risa sing seneng maca kiye duwe kegiatan pirang-pirang. Jaman sekolah SMP dheweke nganti tau dadi juara I lomba jurnalistik. Neng SMA Risa aktip neng kelompok pecinta alam “Eiger Corp”, lan neng kampus melu aktif neng Dewan Perwakilan Mahasiswa Universitas Jendral Soedirman. Senajan ora patia pinter ngomong banyumasan, Risa dhemen pisan maring sipat cablaka.

Merga dheweke duwe cita-cita kepingin dadi dokter gigi, prawan sing duwe kesenengan munggah gunung kiye siki wis semester IV neng Universitas Jendral Soedirman Fakultas Kedokteran Gigi.

Angger detakoni seuwise lulus arep kerja utawa praktek neng endi, jere dheweke kepingin praktek neng dhaerah utawa desa. Merga neng desa kahanane lewih asri lan lewih perek karo alam. Tur akeh wong cablaka beda karo swasana neng kota sing kemrungsung lan wonge arang sing blaka. (Rahmat)

Lewih Lengkape