Tuladha

Prof. Ir. Eko Budihardjo, M.Sc

INTELEK, PRESTASINE MONCER

Pengundang Pak Eko, anak nomer lorone Pak Tedjosoemarto lan Ibu Siti Maemunah. Lair dina Jemuah Paing tanggal 9 Juni taun 1944 neng Desa Kedungwuluh, Kalimanah, Purbalingga. Cilikane uripe neng Purwokerto.

Tokoh sing neng kanca batire ketelah deundang Pak Budi kiye rampung sekolah SR Latihan SGB II taun 1950-1956,SMP Negeri II taun 1956-1959, SMA Negeri II taun 1959-1962 kabeh neng Purwokerto. Neng gurune kon nglanjutna sekolah aristek merga tulisane apik, bijine Aljabar,Ilmu Ukur Sudut, Bahasa Inggris lan Bahasa Indonesia wektu agi sekolah SMP lan SMA uga apik kabeh.

Kawit cilik pancen Pak Eko wis duwe cita-cita kepengin dadi insinyur kaya Ir. Soekarno. Rampung SMA Pak Eko njuran ndaftar Fakultas Kedokteran, Arsitektur lan Fakultas Matematika UGM. Kabeh ketampa, ning Pak Eko milih jurusan Arsitektur merga deumumna lewih dhisit. Pak Eko klebu mahasiswa angkatan pertama neng Jurusan Arsitektur UGM. Taun 1969 lulus olih gelar Sarjana Arsitektur.

Pak Eko klebu wong Indonesia kawitan sing bisa olih gelar Master bidang Perencanaan Perkotaan. Dheweke olih gelar Master of Science of Town Planing sekang University of Wales Institute of Science and Technology, Cardiff, Inggris nalika taun 1978. Nalika umure 46 taun, Pak Eko dadi Guru Besar tetap kawitan neng Undip sing lulusan sekang UGM. Taun 1994 melu LEMHANNAS lan dadi anggota Dewan Riset Nasional.

Jabatane Akeh

Pengalaman lan jabatan sing tau decekel neng Pak Eko akeh pisan. Seurunge dadi Rektor Undip tau dadi Sekretaris Jurusan Arsitektur [1971-1973), Kepala Biro Bangunan(1973-1976), tugas belajar maring University of Wales, Inggris (1976-1978), Kepala Biro Penelitian (1978-1989), Ketua Jurusan Arsitektur (1989-!992), Dekan Fakultas Tehnik (1992-1998) njuran depercaya dadi Rektor Undip nganti rong priode (1998-2006).

Neng babagan organisasi profesi arsitektur tau dadi Ketua Ikatan Ahli Perencanaan (IAP) cabang Jawa Tengah. Dadi pimpinan Lembaga Studi Pembangunan Daerah (LSPD) Semarang, Ketua Ikatan Arsitektur Indonesia (IAI) Cabang Jawa Tengah, Anggota Dewan Pembina Persatuan Sarjana Arsitektur Indonesia (PSAI) Pusat, Ketua Komisi Arsitektur neng Persatuan Insinyur Indonesia (PII) Cabang Jawa Tengah, Ketua Dewan Pertimbangan Pembangunan Kota Semarang (1994-siki). Pendiri Lembaga Sejarah Arsitektur Indonesia (LSAI) Bandung, pendiri Yayasan Tempa Adiguna lan Biro Konsul Tehnik PT Rika Citra Semarang.

Ora mung neng organisasi profesi sing ana neng Indonesia, neng tingkat internasional uga akeh pengalamane. Panjenengane tau dadi Council Members, Eastern Regional Organization for Planning and Housing (EAROPH) Malaysia. Member of International Federation for Housing and Planning Nederland. Uga dadi Council Member of Habitat International Coalition (HIC) Mexico. Sering dadi pemakalah neng pirang-pirang forum ilmiyah sing ana neng luar negeri. Taun 1993 keliling Amerika Serikat blajar lan nliti Konservasi Bangunan Kuno lan Lingkungan Bersejarah. Taun 1994 studi banding babagan urban management neng Australia.

Senajan sarjana arsitektur ning Pak Eko esih gelem aktif neng babagan seni budaya, uga sosial. Panjenengane tau dadi Penasihat Ahli Yayasan Bakti Karya (Yabaka), Anggota Dewan Pakar Ikatan Cendekiawan Muslim Indonesia (ICMI) Jawa Tengah, Presiden Rotary Club Semarang, Ketua Dewan Kesenian Jawa Tengah taun 1994-2008, Ketua Forum Rektor Indonesia (2000-2001).

Senajan akeh banget kesibukane ning Pak Eko esih kober nulis. Pirang-pirang buku arsitektur perumahan lan perkotaan sing wis detulis jumlahe nganti 18 buku. Ora mung nulis buku sing nganggo basa Indonesia, Pak Eko uga nulis karya tulis nganggo basa Inggris. Neng lingkungan kampus Undip tau dadi Pimpinan Redaksi Majalah Tehnik Undip. Penasehat ahli Koran kampus Manunggal lan koran Kartika duweke Kodam IV Diponegoro.

Pak Eko klebu penulis sing produktif. Tulisan sing wis demuat neng koran lan majalah lokal nganti tekan nasional wis atusan jumlahe. Neng Koran Suara Merdeka duwe kolom sing jenenge Gayeng Semarangan. Kesenengane maca lan nulis ndadekna Pak Eko duwe koleksi ewonan buku sing ana neng ruang kerjane. Seliyane maca, Pak Eko uga duwe hobi nonton film, olahraga badminton lan mangan sroto Sokaraja.

Anugrah sing tau detampa neng Pak Eko akeh pisan. Taun 1982 olih anugrah dadi dosen teladan Fakultas Tehnik Undip, Kalpataru, Adi Karya Pariwisata sekang Menteri Pariwisata, Adhicipta Rekaya sekang Persatuan Insinyur Indonesia (1995), anugrah Seroja Wibawa Nugraha Sekang Lemhanas (1994), Pembinaan Seni sekang Mendiknas, bintang Budaya sekang Pusat Lembaga Kesenian Jawa (1993), Upayasa Bhakti Upapradana sekang Gubernur Jawa Tengah,Men of the Year (1993) sekang Harian Suara Merdeka lan sing keri dhewek olih anugrah Satya Lencana Pembangunan sekang Presiden Susilo Bambang Yudhoyono. Pokoke Pak Eko dadi wong sing prestasine moncer temenan.

Goli mbangun bale somah karo Ir. Sudanti Hardjohubojo MSL deparingi putra loro yakuwe Dr Holy Ametati lan Aretha Aprilia ST, MSc.(04)